प्रधानमन्त्री बालेन्द्र शाहले सांसदहरूसँग छलफल सुरु गरेका छन्। सोमबार प्रधानमन्त्री तथा मन्त्रिपरिषद् कार्यालयमा पुगेर उनले छलफल अघि बढाएका हुन्।

प्रधानमन्त्रीको सचिवालयका अनुसार अहिले कर्णाली प्रदेशका सांसदहरूसँग छलफल भइरहेको छ। उक्त छलफलमा विभिन्न दलका सांसदहरूको सहभागिता रहेको छ।

आजै अन्य प्रदेशका सांसदहरूसँग पनि छलफल गर्ने कार्यक्रम तय गरिएको छ। प्रदेशअनुसार समूहगत रूपमा छुट्टाछुट्टै छलफल गर्ने तयारी प्रधानमन्त्री शाहले गरेका छन्।

सचिवालयका एक सदस्यका अनुसार, “आज समय पुगेसम्म समूहमा छलफल गर्ने र बाँकी सांसदहरूसँग अर्को दिन फेरि छलफल गरिनेछ।”

यसअघि आइतबार प्रधानमन्त्री शाहले मन्त्रिपरिषद्का सदस्यहरूसँग पनि छलफल गरेका थिए। सो क्रममा उनले मन्त्रीहरूको योजना सुन्दै काममा कुनै अलमल नगरी अघि बढ्न निर्देशन दिएका थिए।